Unha novela sorprendente sobre os perigos da sobreexposición en redes, a explotación infantil e a falsa felicidade.

Mélanie Claux e Clara Roussel. Dúas mulleres conectadas a través dunha nena. Mélanie participou nun reality show televisivo e é seguidora das súas sucesivas edicións. Cando se converte en nai dun neno e unha nena, Sammy e Kimmy, empeza a gravar o seu día a día e colga os vídeos en Youtube. Crecen en visitas e seguidores, chegan os patrocinadores, Mélanie crea a súa propia canle e o diñeiro flúe. O que ao principio consistía sen máis en gravar de tanto en tanto as andanzas cotiás dos seus fillos profesionalízase, e tras a fachada desta canle familiar tenra e edulcorada hai rodaxes interminables cos nenos e retos absurdos para xerar material. Todo é artificio, todo está en venda, todo é felicidade esaxerada, realidade ficticia.

Ata que un día Kimmy, a filla de pouca idade, desaparece. Alguén a secuestrou e empeza a enviar estrañas peticións. É entón cando o destino de Mélanie se cruza co de Clara, policía solitaria sen apenas vida persoal e que vive por e para o traballo. Ela farase cargo do caso.

A novela arrinca no presente e esténdese ata o futuro próximo. Arrinca con estas dúas mulleres e esténdese á existencia posterior deses dous nenos explotados. De Vigan escribiu unha narración perturbadora que é ao mesmo tempo un thriller inquietante, un relato con pinceladas de ciencia ficción sobre algo moi real e un documento demoledor sobre a alienación contemporánea, a explotación da intimidade, a falsa felicidade proxectada nas pantallas e a manipulación das emocións.

Adultos/as