27 casas non é ningún catálogo inmobiliario nin tampouco un tratado de arquitectura, senón un abecedario de casas construídas coa argamasa da poesía.
Son poemas para entrar a vivir e reflexionar sobre a importancia de ter un fogar, un refuxio, unha gorida. Poemas que falan do dentro e o fóra das casas e os corazóns.
Poemas que se edifican sobre o solar do libro da man de xogos poéticos: un texto monovocálico, poemas con números, versos de cabo roto… E a través da poesía de Raúl Vacas e ao abrigo das ilustracións de David Pintor, percorreremos diferentes lugares do mundo, de China ao Polo norte, de África a Yellowstone.
Na intimidade ou en boa compañía, sexas a neta ou o avó, sexas quen le ou quen escoita, desexamos que este libro te faga sentir sempre como na casa.